आता कोल इंडियावर खासगीकरणाची आफत
Published On : 1 Jun 2023साझा करें:
केंद्र सरकार ३ टक्के हिस्सा विकणार
नवी दिल्ली: देशातील बँका, एलआयसी, विमानतळे, बंदरे, रेल्वे, एअर इंडिया या सरकारी कंपन्यांचे खासगीकरण करून कर्मचार्‍यांना देशोधडीला लावणार्‍या केंद्रातील आरएसएस-भाजपा सरकारने आता कोल इंडियाच्या खासगीकडे मोर्चा वळवला आहे. ३ टक्के हिस्सा विकण्यात येणार असून कोल इंडियावर खासगीकरणाची आफत ओढवली आहे.
१ जूनपासून ऑफर फॉर सेल अंतर्गत कोल इंडिया लिमिटेडमधील तीन टक्क्यांपर्यंत हिस्सेदारी विकणार आहे, अशी माहिती बुधवारी केंद्र सरकारने दिली. तसेच, ऑफर फॉर सेल १ आणि २ जून रोजी किरकोळ आणि बिगर किरकोळ गुंतवणूकदारांसाठी ओपन राहील, असेही सरकारने सांगितले.
केंद्र सरकार सध्या कोळसा उत्पादक कंपनीच्या १.५ टक्के समभागासाठी ९.२४ कोटी शेअर्स विकण्याचा प्रस्ताव ठेवत आहे. याशिवाय, कंपनीकडे अतिरिक्त ९ कोटी २४ लाख ४० हजार ९२४ (१.५० टक्के) इक्विटी शेअर्स विकण्याचा पर्याय असणार आहे. नियामक फाइलिंगनुसार, ओव्हर सबस्क्रिप्शनच्या बाबतीत समान भागभांडवल विकण्यासाठी ग्रीन शू पर्याय असणार आहे. आज व्यापार सत्र बंद झाल्यानंतर, कोल इंडियाचा शेअर बीएसईवर २४१.२० रुपये आहे. त्यानुसार तीन टक्के समभागांची किंमत ४ हजार ४०० कोटी रुपये आहे.
कोल इंडिया लिमिटेड ही एक सरकारी कोळसा खाण कंपनी आहे, जी नोव्हेंबर १९७५ मध्ये अस्तित्वात आली. स्थापनेच्या वर्षात ७९ मिलियन टनच्या माफक उत्पादनासह कोल इंडिया लिमिटेड आज जगातील सर्वात मोठी कोळसा उत्पादक कंपनी आहे. कोल इंडिया लिमिटेड भारतातील आठ राज्यांमध्ये पसरलेल्या ८४ खाण क्षेत्रांमध्ये आपल्या उपकंपन्यांद्वारे कार्यरत आहे. १ एप्रिल २०२० पर्यंत कंपनीकडे ३५२ खाणी आहेत, त्यापैकी १५८ भूमिगत, १७४ ओपनकास्ट आणि २० मिश्रित आहेत.
कोल इंडिया लिमिटेडच्या २६ प्रशिक्षण संस्था आणि ८४ व्यावसायिक प्रशिक्षण केंद्रे आहेत. इंडियन इन्स्टिट्यूट ऑफ कोल मॅनेजमेंट एक अत्याधुनिक व्यवस्थापन प्रशिक्षण ‘सेंटर ऑफ एक्सलन्स’ म्हणून भारतातील सर्वात मोठी कॉर्पोरेट प्रशिक्षण संस्था कोल इंडिया लिमिटेड अंतर्गत कार्यरत आहे.
कोल इंडिया लिमिटेडच्या सात उत्पादक उपकंपन्या आहेत. यामध्ये ईस्टर्न कोलफिल्ड्स लिमिटेड, भारत कोकिंग कोल लिमिटेड, सेंट्रल कोलफिल्ड्स लिमिटेड, वेस्टर्न कोलफिल्ड्स लिमिटेड, साउथ इस्टर्न कोलफिल्ड्स लिमिटेड, नॉर्दर्न कोलफिल्ड्स लिमिटेड आणि महानदी कोलफिल्ड्स लिमिटेड यांचा समावेश आहे.
आपल्याकडे असलेली महत्वाची महािती, लेख, ऑडियो, व्हिडीयो तसेच काही सुचना आपण आम्हाला खालील ई-मेल वर पाठवू शकतां.:
email : news@mulniwasinayak.com
