मीडिया ट्रायल न घेण्याचे रिपब्लिक टीव्हीला आदेश द्या
Published On : 26 Nov 2020साझा करें:
राज्य सरकारची हायकोर्टात मागणी
मुंबई: टीआरपी घोटाळ्याप्रकरणी रिपब्लिक टीव्ही व इतर चॅनेल्सना मीडिया ट्रायल न घेण्याचे तसेच समांतर तपास न करण्याचे आदेश द्या अशी मागणी राज्य सरकारच्या वतीने बुधवारी हायकोर्टात करण्यात आली.
टीआरपी घोटाळ्याप्रकरणी मुंबई पोलीस बेकायदेशीरपणे आणि चुकीच्या पध्दतीने चौकशी करत असल्याचा आरोप हंसा रिसर्च ग्रुप या कंपनीच्या वतीने हायकोर्टात याचिका दाखल करण्यात आली आहे. या प्रकरणाचा तपास सीबीआयकडे हस्तांरित करावा अशी मागणी याचिकेद्वारे करण्यात आली आहे. या याचिकेवर न्या.एस.एस.शिंदे, न्या.मकरंद कर्णीक यांच्या खंडपीठासमोर सुनावणी घेण्यात आली. त्यावेळी राज्य सरकारच्यावतीने ज्येष्ठ वकील कपील सिब्बल यांनी बाजू मांडली.
प्रकरण न्यायप्रविष्ट असताना रिपब्लिक टीव्ही व अन्य वृत्तवाहिन्या मीडिया ट्रायल तसेच त्या प्रकरणाचा समांतर तपास करीत आहेत. या खटल्याची सुनावणी सुरू असताना टीव्ही चॅनेल साक्षीदारांना बोलावत आहे. त्यामुळे किमान पुढील सुनावणीपर्यंत तरी या चॅनेल्सवर बंदी घालावी अशी विनंती त्यांनी खंडपीठासमोर केली. अर्णब गोस्वामीच्या रिपब्लिक टीव्हीच्या वतीने ऍड.अबाद पोंडा यांनी बाजू मांडताना खंडपीठाला सांगितले की, आपल्या अशीलाला त्याच्या जबाबदारीची जाणीव असून ते न्यायप्रविष्ट प्रकरणावर मीडिया ट्रायल घेणार नाहीत. दरम्यान याचिकेत दुरूस्ती करण्याची विनंती रिपब्लिक टीव्हीच्यावतीने करण्यात आली. हायकोर्टाने दोन्ही बाजूकडील युक्तीवाद ऐकून तूर्तास कोणताही आदेश देण्यास नकार देत सुनावणी २ डिसेंबरपर्यंत तहकूब केली.
आपल्याकडे असलेली महत्वाची महािती, लेख, ऑडियो, व्हिडीयो तसेच काही सुचना आपण आम्हाला खालील ई-मेल वर पाठवू शकतां.:
email : news@mulniwasinayak.com
